蘋果日報 財經 2018-04-16

黃根就,今年78歲,他喜歡人們稱他「KC」。幾年前,花逾400萬元買入大埔大日子商場2個四、五十方呎劏舖,「初初睇到個場咁冷清,個心梗住!」最近他的劏場成立業委會,並加入本港其他4個劏場的聯盟後,他坦言:「樂觀哂!」,有信心劏場起死回生。

KC表示,買入大埔大日子2個舖,分別40幾呎及50幾呎,買入價分別190幾萬及220幾萬,目前每月收租6000元,「除開來,維到五、六萬蚊一呎。」他憶述:「係美聯、發展商嘅成功,搵到班好好嘅推銷員,被其中一個經紀介紹。佢以前同我買過啲樓,賺到錢,但只係住宅,劏舖係第1次。佢話有2年包租,當初話呢度好旺……仲專登車我由小西灣入大埔,所以咪話美聯個推銷員成功囉!」
但同場有劏舖貶值80%,KC坦言:「跌得好緊要。距離返家鄉有排,假以時日,亦都可以沙塵啲講句,好彩我唔係等住開飯,咁咪由佢守下囉!如果咁不幸,咪傳俾我個仔,傳俾我個孫,或者講句咩啲,等佢拆,等人收購。」

但成立業委會後,見到委員熱心肯做,不久將來,出租率會好返追到。未來大日子仿效荃灣地皇廣場,先辦聯租,「而家8成業主加入業委會,佢唔聯租,咪isolate佢,唔係話逼佢加入,而係佢蝕底。除左聯租,仲宣傳,如小巴賣廣告,總之成日brainstorming。」

他坦言:「三、四百萬又唔可以話小數目,但唔可以咁沙塵,算中數目啦。唔係我全部身家,諗深一層,我都78歲,又帶唔到落棺材。咪當染左賭癮,去澳門賭輸咗!」

大埔大日子約220舖,出租率約60%,月租由約3000至4000元。